Monday, May 27, 2013

#Ethiopia: ከቃሊቲ ወደ ዝዋይ፤ ለምን?


ልክ የዛሬ 22 ዓመት (ማክሰኞ ዕለት)፣ በግንቦት 20 ኢሕአዴግ ቤተ መንግሥቱን ተቆጣጠረ፡፡ በዕለቱ በኢትዮጵያ ሬድዮ እየተደጋገመ ይተላለፍ የነበረው ‹‹ደርግ ሲጠቀምበት የነበረውን… ለሰፊው ሕዝብ ጥቅም ሲባል… ተቆጣጥሮታል›› የሚሉት ቃላት ያሉበት እወጃ ነበር፡፡ ከ22 ዓመት በኋላ ‹ደርግ ሲጠቀምበት የነበረው፣ ኢሕአዴግ እየተጠቀመበት ነው› ማለት ብቻ ይቻላል፡፡ የ‹‹ሰፊው ሕዝብ›› ጥቅምና ተሳትፎ ተመናምኖ፣ ተመናምኖ አሁን የደረሰበትን ትክክለኛ ቦታ መገመት ያስቸግራል፡፡ ስለሆነም የኢሕአዴግ መንግሥት ‹‹እየተጠቀመበት›› ያለውን ነገር እያስጠበቀ ያለው በአፈና ነው፡፡ በምርጫ አፈና፣ በሚዲያ አፈና፣ በፖለቲከኞች አፈና… ወዘተ፡፡

የዛሬ አራት ዓመት ገደማ በሚያዚያ ወር አጋማሽ ላይ በመንግሥት ባለሥልጣናት ‹‹የመፈንቅለ መንግሥት ሙከራ›› ተብሎ የነበረውና በኋላ ደግሞ በፍርድ ቤት ‹‹ሕገ መንግሥቱን በኃይል የመናድ ሙከራ›› ተብሎ በቀረበው ክስ 23 ሰዎች በቁጥጥር ስር ሲውሉ፣ አንዱ የሞት ፍርድ እና ቀሪዎቹ ደግሞ የዕድሜ ልክ ፅኑ እስራት ተበይኖባቸዋል፡፡

ስለነዚህ እስረኞች መዘንጋት እና የቤተሰቦቻቸው ሁኔታ ከአንድ ወር በፊት ዞን ዘጠኝ ላይ የወ/ሮ እማዋይሽን ልጅ በማነጋገር የተጻፈውን ማንበባችን ይታወሳል፡፡ አሁን ደግሞ ከነዚህ እስረኞች መካከል በእነብ/ጄኔራል ተፈራ ማሞ መዝገብ ከተከሰሱት 23 ‹‹ታራሚዎች›› መካከል ከ4ቱ በስተቀር (19ኙ) ወደዝዋይ በቅርቡ ተዛውረዋል፡፡ ዝውውሩ እነርሱን ብቻ የተመለከተ ባይሆንም፣ ድንገተኛነቱ እና ምክንያት ያልተሰጠበት መሆኑ ጥያቄዎችን እንድናነሳ ያስገድደናል፡፡

ወደዝዋይ ከተዘዋወሩት መካከል ቃሊቲ እንዲቀሩ የተደረጉት አቶ መላኩ ተፈራ ጥላሁን (የሞት ፍርድ)፣ ወ/ሮ እማዋይሽ ዓለሙ (ዕድሜ ልክ)፣ ሌትናንት ኮ/ጌታቸው ብርሌ (ዕድሜ ልክ) እና ኮነሬል ፋንታሁን ሙሃባ (ዕድሜ ልክ) ናቸው፡፡ እነዚህ እስረኞች ከሌሎቹ ተለይተው ለምን እንደቀሩ (ወይም የተዛወሩት ለምን ተለይተው እንደተዛወሩ) ያነጋገርኳቸው ቤተሰቦች ምንም የሚያውቁት እንደሌለ ዘርዝረው ነግረውኛል፡፡ የቃሊቲው ማረሚያ ቤት የመጣበብ ችግር ገጥሞት ይሁን/አይሁን፣ ሌሎች ታራሚዎች ሊመጡበት ታስቦ ይሁን/አይሁን የሚታወቅ ሌላ መረጃ የለም፡፡

የታራሚዎቹ ወደቃሊቲ መዛወር በተለይም ቀድሞ ነዋሪነታቸው አዲስ አበባ የነበሩ በመሆናቸው እና ቤተሰቦቻቸውም በአዲስ አበባ የሚኖሩ በመሆናቸው ትልቅ ፈተናን በጠያቂዎቻቸው ላይ እና በታራሚዎቹም በራሳቸው ላይ ያሳድራል፡፡ ወትሮም ቃሊቲ ድረስ (በየቀኑ ቀርቶ) በየሳምንቱ እንኳን ለመመላለስ የኢኮኖሚም ይሁን የሌላ አቅም ችግር ላለባቸው ቤተሰቦች የታራሚዎቹ ወደዝዋይ መዘዋወር በረዥም ጊዜ አንዴ ብቻ እንዲጠያየቁ የሚያስገድድ ብያኔ ነው፡፡ ታራሚዎች በሚኖሩበት ክልል የመታሰር መብት አላቸው ወይም የላቸውም የሚለውን ጥያቄ ለሕግ ሰዎች ብንተወው እንኳን መንግሥት እንደሞራል አባትነቱ የታራሚዎቹን እና ቤተሰባቸውን እንግልት ለመቀነስ የሚጠበቅበትን ሞራላዊ ግዴታ እየተወጣ እንዳልሆነ መታዘብ ይቻላል፡፡
ከዚህም በላይ፣ በቅርቡ ወደዝዋይ የተዘዋወረውን ጋዜጠኛ ውብሸት እዚያው ዝዋይ ነዋሪ ሁነው ሊጠይቁት የሄዱ ሰዎችን ‹‹ከዝዋይ መጠየቅ አይቻልም›› በሚል የዝዋዩ ማረሚያ ቤት እንደመለሳቸው ሰምተናል፡፡ ይህም ሌላው ሕገ ወጥ እና ኢሞራላዊ ድርጊት ነው፤ ለታዛቢም ‹ታራሚዎቹ ወደ ዝዋይ የሚዛወሩት በብቸኝነት እንዲቀጡ ነው ወይ?› ብሎ እንዲጠይቅ ያስገድዳል፡፡

የ‹‹ታራሚ››ዎቹ አያያዝ

የታራሚዎች አያያዝ ከእስረኛ እስረኛ የተለያየ እንደሆነ ከተለያዩ ምንጮች መስማት የተለመደ ነው፡፡ ከፖለቲካ ጋር በተነካካ ጉዳይ የታሰሩ ታራሚዎች በ‹‹ሌላ›› ወንጀል ድርጊት ከታሰሩ ሰዎች ያነሰ መብት ያላቸው የሚመስልበት አሠራር አለ፡፡ የቃሊቲው ማረሚያ ቤት እነዚህን የ‹‹ፖለቲካ እስረኞች›› አይደሉም የሚላቸውን የፖለቲካ እስረኞች የመጠ’የቂያ ሰዓታቸውን በልዩነት አስቀምጦታል፡፡ ሌሎቹ ታራሚዎች ቅዳሜና እሁድ ጠዋቱን ሙሉ የሚጠየቁ ቢሆንም፣ የፖለቲካ እስረኞች ግን ከ6፡00 ሰዓት እስከ 6፡30 ለግማሽ ሰዓት ብቻ እንዲጠየቁ ይደረጋሉ፡፡ ታራሚዎቹ ሲጠየቁ ከወዳጅ ቤተሰቦቻቸው ጋር የሚወያዩትን ለማድመጥ እንዲችሉ ጠባቂዎቻቸው ከአጠገባቸው ይቆማሉ፡፡ መጽሐፍቶች ተመርምረው እና ታይተው ብቻ ነው የሚገቡላቸው፡፡ አንዳንዴ ፖለቲካ ያልሆኑ ፖለቲካ የሚመስሉ መጽሐፍቶች ሳይቀሩ እንዳይገቡ ይታገዳሉ፤ ለምሳሌ ‹የሎጥ ሚስት› የሚለው ልቦለድ ለጋዜጠኛ ውብሸት እንዳይገባ ታግዶበታል፡፡

አቶ ስዬ አብርሃ እና አቶ ታምራት ላይኔ በእስር ላይ በነበሩበት ጊዜ በእስር በነበሩባቸው ጊዜ ምግብ አሙቀው ለመብላት የሚያስችላቸው ቁሳቁስ ገብቶላቸው የነበረ መሆኑ ይታወሳል፡፡ በተጨማሪም፣ የማረሚያ ክፍሎቹ የጋራ መፀዳጃ ቤት እና ሻወር ቢኖራቸውም ንፅሕናቸው የተጠበቀ ባለመሆኑ ሁለቱም ታራሚዎች ማታ፣ ማታ ወጣ ብለው እስከ አራት ሰዓት አምሽተው እንዲመለሱ ተፈቅዶላቸው ራታቸውን ሁሉ ሳይቀር ውጪ በልተው ይመለሱ እንደነበር - ስለእስረኞች አያያዝ ለማጣራት ሙከራ ሳደርግ ሰምቻለሁ፡፡

እነዚህ ሁሉ ለነአቶ ስዬ ሲደረጉ የነበሩ እንክብካቤዎች ግን ለሌሎቹ የፖለቲካ እስረኞች የሚሞከሩ አይደሉም፡፡ እንዲያውም የማረሚያ ቤቱን እራት እስከ 10 ሰዓት ድረስ መብላት እና እስከ 12 ሰዓት ድረስ ተፀዳድቶ መግባት በተለይ የቃሊቲ ማረሚያ ቤት (የፖለቲካ እስረኞቹ) አያያዝ ‹‹ደንብ›› ነው፡፡

አቶ መላኩ ተፈራ ‹‹ሕገ መንግሥቱን ለመናድ መሞከር›› በተባለው ክስ የሞት ቅጣት የተበየነባቸው ፍርደኛ ናቸው፡፡ አቶ መላኩ ተፈራ ‹‹የአንድነት ለዴሞክራሲና ለፍትሕ ፓርቲ መሥራች፣ የማዕከላዊ ኮሚቴ አባልና የሰሜን ኢትዮጵያ ዋና አደራጅ - የሙሉ ቀን ፖለቲከኛ›› እንደነበሩ ነግረውኛል፡፡ በዕድሜያቸው ገፋ ያሉ እና አልፎ አልፎ ከውጭ አገር እየመጡ ከሚጠይቋቸው ልጆቻቸው በቀር በቋሚነት የሚጠይቋቸው ባለቤታቸው ብቻ ናቸው፡፡ ሁለቱም በዕድሜ ከፍ ያሉ በመሆናቸው ለሳምንታዊዋ 30 ደቂቃም ቢሆን አረፍ ብለው መነጋገር የሚችሉበት ሁኔታ እንዲመቻች ቢጠይቁም ማረሚያ ቤቱ ምላሽ ሳይሰጣቸው ጆሮ ዳባ ልበስ እንዳለ አጫወተውኛል፡፡

እርሳቸው የደም ግፊት እና የነርቭ በሽታ እንዳለባቸው ቢናገሩም፣ በወር አንዴ የደም ግፊቱን መድኃኒት ይዘው ከሚመጡት የጤና ባለሙያዎች ጋር ከመገናኘት በላይ ክትትል አይደረግላቸውም፡፡ በቅርቡ እንደሰማነው ጋዜጠኛ ርዕዮት ዓለሙም በገጠማት የጤና ችግር አፋጣኝ እና ጥሩ ሕክምና እንድታደርግ መፍቀድ ቀርቶ በረዥም (ያውም ለታካሚዋ ቀኑ በማይነገር) የሕክምና ቀጠሮ በማመላለስ የጤንነቷ ሁኔታን ስጋት ውስጥ ሊገባ የሚችልበትን ዕድል ማረሚያ ቤቱ በቸልተኝነት ፈቅዷል፡፡ በጥቅሉ የማረሚያ ቤቱ አያያዝ በተለይም የፖለቲካ እስረኞች ላይ የሁለትዮሽ (የማግለል) አቋም ያራምዳል ማለት ይቻላል፡፡

በእነብ/ጄኔራል ተፈራ ማሞ መዝገብ የተከሰሱት ታራሚዎች ይቅርታ ከጠየቁ የከረሙ ቢሆንም አሁንም መንግሥት /ማረሚያ ቤቱ/ ሊፈታቸው ፈቃደኛ ሳይሆን፣ ጭራሽ ወደዝዋይ ማረሚያ ቤት እያዛወራቸው ይገኛል፡፡ ወደዝዋይ ማረሚያ ቤት ማዛወሩ ቋሚ ቦታ እየተፈለገላቸው ከሆነ ይቅርታቸው ‹‹ተሰርዟል ወይም ተቀባይነት አላገኘም›› ማለት ስለሚሆን ይኸው ተገልጾ ሊነገራቸው በተገባ ነበር፤ ካልሆነም ደግሞ የቤተሰባቸውንም የፍርደኞቹንም ሕይወት በሚያመሳቅል ሁኔታ እያንገላቱ ጊዜ ከማባከ ቶሎ ፈትቶ ሕገ-መንግሥታዊ ስርዓትን ማስጠበቅ ተገቢ ይሆናል፡፡ አሁንም ቤተሰቦች ይጠይቃሉ፤ የዝውውሩ ምስጢር ምንድን ነው? ይቅርታ የጠየቁትስ የማይፈቱት ለምንድን ነው?

Friday, March 1, 2013

#Ethiopia: የአድዋ [ዕ]ድል


መቶ ዐሥራ ሰባት ዓመት ወደኋላ፤ መጀመሪያ (ከዚህም ዓመታት በፊት) አውሮጳውያን ኃያላን በበርሊን ያደረጉት ‹‹አፍሪቃን የመቀራመት›› ስምምነት ይቀድማል፡፡ ሁሉም የየራሳቸውን ሲወስዱ፣ ጣሊያንም ኢትዮጵያ (እና ሶማሊያ…) ደርሰዋት ነበር፡፡ የመጀመሪያው የጣሊያን ጦር በባሕርምላሽ (የአሁኗ ኤርትራ) በኩል ሲመጣ የወቅቱ የባሕርምላሽ ገዢ የነበሩት የራስ አሉላ እንግዳ (አባ ነጋ) ሠራዊት የጣሊያንን ሠራዊት ዶጋሊ ላይ በተደረገ ፍልሚያ ከ500 ወታደር 100 ብቻ በሕይወት አስቀርቶ መለሰው፡፡ ያኔ የጣሊያን ፓርላማ ተሰበሰበ፤ ተሰብስቦም አላበቃ በ332 ለ40 አብላጫ ድምፅ ወደኢትዮጵያ ተጨማሪ (5000ሺ ወታደር የያዘ) ሠራዊት ለመላክ ወሰነ፡፡

ከዚያ በኋላ ነው የውጫሌ ውል የተከተለው፡፡ ለጠነከረ ወዳጅነት እና ለጋራ ተጠቃሚነት በምኒልክ እና በጣልያን መልእክተኛ መካከል የተፈረመው የውጫሌ ውል ደግሞ አማርኛውና ጣልያንኛው አንድ ዓይነት ትርጉም ይኑረው ቢልም አንቀጽ 17 ‹‹ኢትዮጵያ የጣልያን ሞግዚት›› እንድትሆን በተዘዋዋሪ የሚያታልል ነበር፡፡ ትርጉሙ ሲነቃበት ዐጤ ምኒልክ ውድቅ ከማድረግ አልተመለሱም፡፡ እንግዲህ የአድዋ ጦርነት መነሻ የሚባለው ይህ ቢሆንም፣ ኢትዮጵያ ለኢጣሊያ የበርሊን ስምምነት ሽልማት መሆኗ ግን መሠረቱ ነው፡፡

ጦርነቱ ሲጀመር አገር ዘመተ፡፡ 80,000 ኢትዮጵያውያን ለጦርነቱ ሲወጡ ከነዚህ ውስጥ ቆመህ ጠብቀኝ ጠብመንጃ የታጠቁት ጥቂቶቹ ነበሩ፡፡ ሌላው ጦርና ጋሻውን እየሰበቀ ወጣ፡፡ በጣሊያን በኩል ደግሞ 18,000 ወታደሮች ተሰለፉ፡፡ የአገር ፍቅር፣ የጀግንነት እና የአትንኩኝ ባይነቱ ጦርነት ተጀመረ፡፡ ጀግኖች ተጋደሉ፤ በዕለቱ ጦርነት ማብቂያ ላይ የጣልያን ሠራዊት በአውሮጳውያን የቅኝ ገዢነት ታሪክ ታይቶ የማይታወቅ እልቂት አስተናገደ፡፡ እስከ 7,000 የሚገመቱ የጣሊያን ወታደሮች ሞቱ፣ 3000 ያህል ተማረኩ፤ በኢትዮጵያ ወገንም 4,000 የሚጠጉ ተሰዉ፣ የቆሰሉት ደግሞ ከ10,000 በላይ ነበሩ፡፡ ድል ለኢትዮጵያ ሆነ፡፡

Thursday, February 21, 2013

#Ethiopia, #StopCensorship: ሐሳብን በነጻ መግለጽ በኢትዮጵያ - ሕገ መንግሥት ላይ እና በተግባር



በበፍቃዱ ኃይሉ

ሰሞኑ ‹‹የሕገ-መንግሥቱ›› ይከበር የበይነመረብ ዘመቻ 2ኛ ዙር በአንቀጽ 29 (ሐሳብንና አመለካከትን የመያዝና የመግለጽ መብት) ይከበር ዙሪያ በዞን ዘጠኝ አስተባባሪነት እየተካሄደ እንደሚገኝ ይታወቃል፡፡ ለዘመቻው ግብአት እንዲሆኑ አንዳንድ እውነታዎችን ስለሕገመንግሥቱ እና ስለቀደሙት፣ ስለአተገባበሩም ጭምር እነሆ፡-

ሐምሌ 30/1966 በንጉሡ ነገሥት መንግሥት ረቂቅ ሕገ-መንግሥት፡-

አንቀጽ 25/1

ማንኛውም ኢትዮጵያዊ የሐሳብ ነፃነት አለው፡፡ ማናቸውንም ሐሳብ በንግግር፣ በጽሑፍ ወይም በሌላ ዘዴ የመግለጽና የማሰራጨት እንዲሁም ሌሎች የገለጹትን የማወቅ መብት አለው፡፡

አንቀጽ 25/2

ማንኛውም ሰው በቴሌፎን፣ በቴሌግራፍ፣ በፖስታ ወይም በማናቸውም ሌላ የመገናኛ ዘዴ ሚስጢሩ እንደተጠበቀ የመነጋገርና የመላላክ መብት አለው፡፡

Saturday, January 5, 2013

እነዚህን አንብባችኋቸዋል?

በዚህ ጦማር ላይ ከጻፍኩ ሰነበትኩ:: ነገር ግን ብዙዎቻችሁ እንደምታውቁት የጠፋሁት መጻፍ እርም ብዬ ሳይሆን ዞን ዘጠኝ ላይ መጻፍ በመጀመሬ ነው:: ታዲያ ምናለ ይሄንን subscribe አድርገው ዞን ዘጠኝን ያላደረጉ ካሉ ቢያነቡኝ ብዬ ጥቂቶቹን እንዲህ ዘረዘርኳቸው:: እንዳሻችሁ አድርጓቸው::


15. የሥርዐት ለውጥ እና ሃይማኖቶች

14. ለውጥን መቋቋም እና መፍራት

13. አብዮት ወይስ አዝጋሚ-ለውጥ?

12. ግልጽ ደብዳቤ ለጠቅላይ ሚኒስትር ኃይለማርያም ደሳለኝ

11. በኢትዮጵያ የቡድን አመራር ተጀምሯል?

10. የጉዞ ማስታወሻ፤ ሥልጣኔ ወደላይ እና ወደታች

9. የጉዞ ማስታወሻ፤ መቐለን በአንድ ቀን

8. ኢሕአዴግ ሥልጣኑን በምርጫ ይለቃል?

7. “ጠንቅቆ” የመጻፍና አለመጻፍ ጉዳይ

6. የእነርሱ እና የእኛ ሕዳሴ

5. የታክሲ ሰልፍ መጀመሪያውና መጨረሻው

4. ‹‹ሕዝብ›› ምንድን ነው?

3. የትችት ባሕላችንን ብንተቸውስ?

2. ይቅርታ የሚገባው የኢትዮጵያ ሕዝብ!

1. “አራማጅነት” በኢትዮጵያ



Thursday, November 8, 2012

የአዲስ አበባ ከተማ እና ምርጫዋ


አዲስ አበባ 125ኛ ዓመቷን እያከበረች ነው፡፡ በከተማይቱ ልደት ሰሞን እናትና አባቷ (በመናገሻ ከተማነት የቆረቆሯት አጤ ምኒልክ እና ስሟን ያወጡለት እቴጌ ጣይቱ) ስማቸው ሲነሳ አልሰማሁም፡፡ ይልቁንም ላለፉት 21 ዓመታት በፌዴራል መንግሥቱ ርዕሰ መሪነታቸው በእጅ አዙር የዘወሯት የቀድሞው ጠቅላይ ሚኒስትር ስም በተደጋጋሚ ሲነሳ እና በየመንገዱ ዳር በቆሙ ‹ቢልቦርዶች› ላይ ከከተማይቱ የመሠረተ ልማት አውታሮች ፎቶ ፊት ለፊት በጉልህ በተቀመጡ ምስሎቻቸው ታጅቦ ታይቷል፡፡

የክብረ በዓሉን ክንውን እንዲያዘጋጅ የኢሕአዴግ ሰዎች የሚመሯቸው ዋልታ እና ፋና ጥምር-ድቅል የሆነው ዋፋ የማስታወቂያ ድርጅት ሙሉ ኃላፊነቱን ወስዷል፡፡ ምናልባትም የዚሁ የፓርቲ ጥገኝነት ጉዳይ ይሆናል መለስን በግምባር ቀደምነት የከተማይቱን ቆርቋሪ አስዘንግቶ ያስጠቀሳቸው፡፡

ለነገሩ ይህን ጽሑፍ ለማሰናዳት ያነሳሳኝ የክብረ በዓሉን ዐብይ-ሰብ (figure) ለመሰየም አይደለም፡፡ ስለከተማይቱ እያነሳሁ ይህንን ያፈጠጠ ስህተት ሳልነቅስ ማለፍ ስላልሆነልኝ ነው፡፡ የጽሑፌ ርዕሰ ጉዳይ ሚያዝያ ወር ላይ የሚካሄደው ምርጫ ነው፡፡

የአዲስ አበባ ከተማ ምርጫ ከሀገር አቀፍ ምርጫ በሁለት ዓመት እንዲዘገይ የሆነው፣ በምርጫ 97 ከአንድ ወንበር በስተቀር ሁሉንም የከተማዋን ምክር ቤት መቀመጫዎች አሸንፎ የነበረው ቅንጅት ምክር ቤቱ ለመግባት ባለመፍቀዱ  ማሟያ ምርጫ እስኪካሄድ በተፈጠረው መዘግየት ሳቢያ ነው፡፡

ሀገሪቱ ከአንድ ጠቅላይ ሚኒስትር በላይ ባላየችባቸው ሁለት ዐሥርት ዓመታት ውስጥ፣ አዲስ አበባ አምስት ከንቲባዎችን ለማየት ታድላለች፡፡ አንዴ ግዜያዊ የባለአደራ ከንቲባ ስታስተናግድ ቀደም ብሎ ደግሞ ‹‹ተበለሻሸች›› ተብሎ - የጠቅላይ ሚኒስትሩ ስልጣን በሚፈቅደው መሠረት - ምክር ቤቷ ፈርሶ በድጋሚ እንዲገነባ ተደርጎ ነበር፡፡ በነዚህ ጊዜያት ከተሠሩ ሕንፃዎች እና መንገዶች በተጨማሪ በተለይ ሕዝቡን ያማከለ ሥራ የሠሩት አርከበ ናቸው፡፡ አርከበ የኮንዶሚኒዬም ቤቶችን እና አርከበ ሱቆች ተብሎ በማኅበረሰቡ የተሰየሙላቸውን ጥቃቅን እና አነስተኛ ንግድ ቤቶች ያስጀመሩ ከንቲባ ናቸው፡፡

በዐሥር ክፍለከተሞችና ከ100 በላይ በሆኑ ቀበሌዎች (አሁን ወረዳዎች) የተከፋፈለችው አዲስ አበባ ከ5 እስከ 7 ሚሊዮን የሚደርሱ ነዋሪዎች እየዋሉ እንደሚያድሩባት ይገመታል፡፡ ከነዚህ ውስጥ የነዋሪነት መታወቂያ ያላቸው ከ3 ሚሊዮን አይበልጡም፡፡ ለምርጫ ብቁ የሆኑት ደግሞ 2.2 ሚሊዮን የሚጠጉት ብቻ ናቸው፡፡

Monday, October 15, 2012

የኛ ኃይል



ከዞን ዘጠኝ የተወሰደ


“ፒያሳ፤ መሐሙድጋ ጠብቂኝ” በመሐመድ ሰልማን የተጻፈ እና ከፍተኛ ተወዳጅነትን ያተረፈ ኢ-ልቦለዳዊ መጣጥፎች ስብስብ ነው፡፡ የዛሬ ዓመት ገደማ ሚዩዚክ ሜይዴይ ኢትዮጵያ በተባለ መንግስታዊ ባልሆነ ድርጅት  አማካይነትመጽሐፉን የመገምገሚያ ዝግጅት አምስት ኪሎ በሚገኘው ብሔራዊ ሙዚዬም ቀርቦ ነበር፡፡ በውይይቱ መሐል የመጽሐፉ ዝነኝነት ምንጮች ምን ምን ናቸው የሚል ውይይት የነበረ ሲሆን ከአስተያየት ሰጪዎቹ መካከል ‹‹ደራሲው የአዲስ ነገር ጋዜጣ ጸሐፊ የነበረ›› መሆኑን እና ‹‹ጽሑፎቹም በአዲስ ነገር ጋዜጣ እና ድረገጽ ላይ ወጥተው የነበሩ›› መሆናቸውን ጠቀሰ፡፡ ውይይቱ የአዲስ ነገር ጋዜጣ መታሰቢያ ይመስል፣ የትዝታ ጫወታው ተጧጧፈ እናም ከውይይቱ ተሳታፊዎች አንዱ የሚከተለውን ሲናገር ረዥም ጭብጨባ አዳራሹን አደመቀው ወጣቱ አስተያየት ሰጪ በንግግሩ መሃል የተጠቀመው እና ጢም ብሎ የሞላውን አዳራሽ በጭብጨባ ያናጋው ንግግር የሚከተለው ነበር፡፡

‹‹ይህ ትውልድ በአዲስ ነገር ጋዜጣ የሚደራደር ትውልድ አይደለም፡፡››

ጉዳዩን አስገራሚ የሚደርገው ወጣቱ ይህንን የተናገረው አዲስ ነገር ጋዜጣ መታተም ካቆመች ከሁለት ዓመታት በኋላ መሆኑ ሲሆን፣ አጋጣሚው የጋዜጣዋ መንፈስ በበርካቶች ልብ ውስጥ በትኩስነት መኖሩን የሚናገር ነበር፡፡

ዛሬ፣ ጥቅምት 5/2005 የዓለም የጡመራ የተግባር ቀን (Blog Action Day 2012) “የኛ ኃይል” በሚል መሪ ቃል ይከበራል፡፡ የጡመራ የተግባር ቀን በየዓመቱ የሚከበር፣ በዓለም ዙሪያ ያሉ ጦማሪዎች በሙሉ በአንድ ሐሳብ ዙሪያ የሚጽፉበት ቀን ነው፡፡ የተጀመረው እ.ኤ.አ. በ2007 ሲሆን በተመሳሳይ  ዓመት ‹‹አካባቢ››፣ በ2008 ‹‹ድህነት››፣ በ2009 ‹‹አየር ለውጥ››፣ በ2010 ‹‹ውሃ››፣ በ2011 ‹‹ምግብ›› በሚል ሲካሄድ ዘንድሮ ደግሞ በ2012 ‹‹የእኛ ኃይል›› በሚል እየተካሄደ ይገኛል፡፡

የዘንድሮው መሪ ቃል፣ ማኅበረሰብ፣ እኩልነት፣ ፀረ-ሙስና እና ነጻነትን በተመለከተ የኛ ኃይል ምን እንደሆነ በመስበክ እንዲከበር ታስቦ የተመረጠ ነው፡፡ አከባበሩ ቀላል ነው፤ አስተባባሪዎቹ እንዳስቀመጡት ‹‹profile someone or a group who inspires you by the way they made a positive influence… (ባመጡት አዎንታዊ ተጽዕኖ ያነቃቃችሁን የየሆነ ሰው ወይም ቡድን በመምረጥ ጻፉ…)›› የሚል ነው፡፡

እኛም ጮክ ብለን ስናስብበት እና በጭንቅላታችን ያቃጨለችው አዲስ ነገር ጋዜጣ ብቻ ሆነች፡፡ አዲስ ነገር ጋዜጣ ለሁለት ዓመታት (ከጥቅምት 2000 እስከ ታሕሳስ 2002) ብቻ በስርጭት የቆየች ነገር ግን መራኄ አዘጋጇ መስፍን ነጋሽ የጋዜጣዋን ሁለተኛ ዓመት አስመልክቶ እንደገለፀው ‹‹አጭር ግን ረዥም ዓመት›› የኖረች ያክል የማትረሳ ጋዜጣ ናት፡፡

Tuesday, October 9, 2012

የኃይለማርያም ፲ ተግዳሮቶች



የቀድሞው ጠቅላይ ሚኒስትር መለስ ኅልፈት ከተሰማ 50 ቀናት ሆኑት፤ አዲሱ ጠቅላይ ሚኒስትር ኃይለማርያም ቃለ መሓላ ከፈፀሙ ደግሞ 18 ቀናት፡፡ እነዚህ ከሁለት ሳምንታት እምብዛም ያልበለጡ ቀናት የጠቅላይ ሚኒስትር ኃይለማርያምን አያያዝ ለመገምገም በቂ አይደሉም ነገር ግን ‹‹ያባት ዕዳ ለልጅ›› በሚለው ብሒል መሠረት የመለስን ፈለግ በመከተል እና ባለመከተል መካከል፣ ሊያመጧቸው በሚችሏቸው ለውጦች እና ሕዝብ/አገር ከሚጠብቅባቸው ነገሮች አንፃር የሚጠብቃቸውን ተግዳሮት ማስቀመጥ ይቻላል፡፡

ጠቅላይ ሚኒስትር ኃይለማርያም በተለይ ከቪኦኤ የእንግሊዝኛው አገልግሎት ጋር ባደረጉት የ40 ደቂቃ ቃለምልልስ፥ ከቀድሞው ጠቅላይ ሚኒስትር የተለየ አቋም እንደሌላቸው መታዘብ ይቻላል፡፡ ፓርቲውም ቢሆን የአቶ መለስን ውርስ ለማስቀጠል እንደሚተጋ በተደጋጋሚ ተናግሯል፡፡ በተቃራኒው መለስ የሚባልላቸውን ያህል ውጤታማ እና ፍፁም አልነበሩም፡፡ ለዚህም ምስክሩ ሳይዘጉ የተዉአቸው የሚከተሉት አጀንዳዎች ናቸው፡፡ የአቶ ኃይለማርያም ተግዳሮቶች ሁነው ይቀጥላሉ፡፡

Can Ethiopia Gain Access to the Sea Without a War?

Ethiopia is the world's most populous landlocked country. Yet discussing it was politically taboo, and the EPRDF regime dismissed it as ...